La nepo de L. L. Zamenhof, s-ro Louis-Christophe
Zaleski-Zamenhof, aktiva subtenanto de Esperanto, forpasis en Parizo la 9-an de
oktobro 2019 en la aĝo de 94 jaroj.
Li naskiĝis en Varsovio la 23-an de januaro
1925 kiel filo de Adam Zamenhof kaj de lia
edzino Wanda kaj honore al sia
avo estis nomita Ludwik. Ambaŭ liaj gepatroj same kiel LLZ laboris kiel
okulkuracistoj. Tuj komence de la dua mondmilito la familia domo estis tute
detruita per bombatakoj kaj baldaŭ poste lia patro estis mortpafita far
gestapo. Juna Ludoviko vivis en krudaj kondiĉoj kun sia panjo en la varsovia
geto. Nur dank al fuĝo kaj ricevo de la falsaj dokumentoj (far la membroj de la
rezistmovado) li povis estis savita antaŭ forveturigo al la koncentrejo
Treblinka kaj sub nova nomo (Krzysztof Zaleski) kun la panjo transvivis finon de
la milito. Pri liaj rememoroj tiutempaj vi povas legi en la atentokapta libro LA
ZAMENHOF-STRATO de Roman Dobrzynski, aperinta en 2001 en la pola kaj post
du jaroj en Kaunas en Esperanto kaj tradukita sekve al la angla, franca,
germana, hispana, itala, sed ankaŭ al la litova, japana, kroata, slovaka,
slovena, portugala, korea kaj aliaj lingvoj. En la ĉeĥa ĝi aperis en traduko
de Jiří Patera ĉe la eldonejo KAVA-PECH en 2005. Parton de la tradukoj
subvenciis la japana mecenato Etsuo Myioshi.
En 1949 Ludoviko-Kristoforo finstudis en Varsovio konstrufakon
(kun specialiĝo pri betonaj konstruaĵoj) kaj samjare geedziĝis kun Krystyna
Tyszka, kun kiu li havis du filinojn: Hanna (1953) kaj Margaret (1958). En
1959 li elmigris al Parizo, kie li sekve ekhavis la duan edzinon Juliette. Li
realigis diversajn surterajn kaj marajn konstruaĵojn, instruis en Parizo kaj
Milano, prelegis kaj verkis multajn fakajn artikolojn kaj publikaĵojn en la
pola, franca, angla kaj Esperanta lingvoj. Esperanton li ellernis kiel 9jara
knabo (pro la emo partopreni UK-on en Stokholmo). Li partoprenis plurajn
kongresojn kaj aliajn aranĝojn, sed rilate al Esperanto li reaktiviĝis precipe
nur post sia emeritiĝo. Tiam li fariĝis kaj restis aktiva subtenanto kaj
favoranto de la lingvo kaj de la movado. En 2007 li fariĝis honora civitano de
la Zamenhofa naskiĝurbo Bjalistoko.
Dum la UK-o en Roterdamo en 2008 kun la vicurbestro de Bjalistoko Aleksander Sosna
Pliajn detalojn pri lia vivo vi povas legi en la VIKIPEDIA ARTIKOLO.
En 2012 li prezentiĝis en la 5minuta dokumenta filmo, kiun konata pola reĝisoro Roman Dobrzynski kreis por la internacia filmkonkurso „Esperanto 125jara“. La filmo estas parolata pollingve, kun Esperantaj subtekstoj.
Por spekti la filmeton „ZAMENHOF EN VARSOVIO“ KLAKU ĈI-TIE
Oficiala alparolo dum la 100-a Universala Kongreso en Bulonjo-ĉe-Maro en 2015
Dum la sama kongreso okazis podia diskuto de la tiama UEA-prezidanto Mark Fettes kun li, lia filino Margaret kaj la nepo Pierre-Louis-Antoine.
Afabla modesta personeco de s-ro Zaleski certe mankos al ni kaj meritas esti neforgesita.
Recenzo pri La Zamenhof-strato en La Ondo de Esperanto
Recenzo de U. Lins pri La Zamenhof-strato en la revuo Esperanto
Japana mecenato subvencias tradukojn de Zamenhof-strato
Pavla Dvořáková (-padv-)
#1 Josef Vojáček
Mi partoprenis kelkajn UK-ojn, kiujn partoprenis ankaŭ L. K. Zaleski-Zamenhof. Iam li diris, ke li ŝatas partopreni UK-ojn, ĉar tie li estas nepo, sed hejme avo.