Forpasis prof. d-ro Vlastimil Novobilský

Li naskiĝis la 15-an de februaro 1935 en Melč apud Opava en Ĉeĥio. Lia patro Jaroslav estis pioniro de Esperanto en la regiono kaj progresema instruisto, kiu en 1942 pereis en nazia koncentrejo Mauthausen. Al li Vlastimil Novobilský dediĉis biografian libron kun subtitolo „Viro, kiu superigis moralajn principojn antaŭ mortotimo“, kiun en 2019 en la ĉeĥa lingvo eldonis KAVA-PECH de Petro Chrdle.

bebaĝe kun siaj gepatroj kaj fratino kaj junaĝe kun sia edzino Věra (fonto)

Finstudinte kemion en Karola Universitato en Prago li fariĝis esploristo kaj sekve altlerneja instruisto. En 1990 li kunfondis Universitaton de J. E. Purkyně en Ústí nad Labem kaj en 1995–2001 estis ĝia rektoro. Li estas aŭtoro de multaj fakaj artikoloj kaj kunaŭtoro de vaste uzita lernolibro pri ĝenerala kaj organika kemio.

Esperanton li eklernis 1946 kiel 11jara knabo kaj ekde junaĝo vaste ekaktivis por la tuta vivo en la movado en sferoj instrua, prelega, redaktora, verkista kaj organiza.

Pliaj detaloj troveblas en la artikolo en Esperanta Vikipedio.

La 23paĝa listo de lia admirinde vasta poresperanta agado – kvankam en la ĉeĥa, povas doni proksimuman imagon pri lia graveco por la internacia movado. Li okupiĝis ankaŭ pri komeniologio kaj pri faka apliko de Esperanto.

Lia edzino Věra, denaska Esperantoparo­lantino, estas filino de la elstara Esperanto-poeto kaj tradukisto Jiří Kořínek, kies artan heredaĵon V. Novobilský konservadis.

En KAVA-PECH aperis ankaŭ biografio pri Petr Ginz nomita Taglibro de mia frato, kiun li kun la edzino tradukis el la ĉeĥa al Esperanto. En 2017 KAVA-PECH eldonis lian ĉeĥlingvan biografion pri Francisko Valdomiro Lorenz, en 2018 ankaŭ en Esperantlingva traduko de Margit Turková.

Surfote geedzoj Novobilský prezentas Taglibron de mia frato en EKP Brno en 2013 (fonto).

* geedzoj Novobilský kun esperantistoj en Kronach

Vlastimil Novobilský forpasis pro kovim-19, malfortigite de longdaŭra grava malsano. En lia persono ni perdas prestiĝan fakulon kaj universalan klerulon, senlacan entuziasman laboranton por la ideo de Esperanto kaj precipe afablokoran estimindan homon, kiu sendube mankos al ni. Ni lasu lin pluvivi inter ni per ekkono de almenaŭ kelkaj liaj verkoj kaj per lia inspiro por nia propra aktivado por la aliaj.

Pavla Dvořáková

LIGILOJ:

• Sonregistraĵo kun la voĉo de Vlastimil Novobilský – 2minuta specimeno el la sonprelego pri Komenio
• Novobilský, V. – Skizo pri la Esperanta literaturo, rimarkinda manlibro, kiun li verkis en 1956 kiel 21jara studento
• Novobilský, V. – Bibliografio Ĉeĥa literaturo en Esperanto kaj Esperanto-verkoj far ĉeĥaj aŭtoroj 1890–1980, eld. ĈEA 1983
• Novobilský, V. – prelego pri la Nobelpremiito Jaroslav Heyrovský por la Internacia Kongresa Universitato dum la 81a UK en Prago en 1996
• Ota Ginz – esperantisto en Ĉeĥoslovakio – almenaŭ unu ekzemplo el liaj multaj Esperanto-artikoloj
• Fotografaĵoj el la familia arkivo (sube de la paĝo Pametnaroda.cz – projekto Memoro de la nacio)
• Bonvenon en Ústí nad Labem – triminuta Esperante dublita filmeto pri la urbo, kie V. Novobilský pasigis la plej grandan parton de sia vivo