Belartaj konkursoj de UEA en 2011
La gvida Esperanta artkonkurso, la Belartaj Konkursoj de UEA,
invitas partoprenantojn jam por la 62-a fojo! La rezultojn oni
anoncos en la 96-a Universala Kongreso en Kopenhago. Partopreno estas libera al
ĉiuj kaj ne ligita al partopreno en la UK nek al membreco en UEA.
Ĉu ne tentas vin mem elprovi vian literaturan talenton?
La konkursaĵoj devas esti neniam antaŭe publikigitaj en ajna formo, escepte de la branĉoj Infanlibro, Filmo kaj Kanto. Oni rajtas sendi maksimume tri konkursaĵojn por sama branĉo. Validas krome jenaj kondiĉoj:
Poezio: maksimuma longo ne fiksita.
Prozo: maksimuma longo 200×65 karaktroj (kvino da paĝoj).
Teatraĵoj: maksimuma longo ne fiksita.
Eseo: teme ligita kun Esperanto aŭ kun la kongresa temo „Dialogo kaj interkompreno“, proksimuma longo 400×65 karaktroj (deko da paĝoj). La unua premio nomiĝas „Luigi Minnaja“.
Infanlibro de la Jaro: originala aŭ tradukita libro por infanoj presforme aperinta en 2010. Unu premio.
Filmo kaj Kanto: La juĝantoj priatentos la produktojn aperantajn sur la Esperanto-scenejo en tiuj du branĉoj kaj, se ili opinias iun verkon valora, ili atribuos la koncernajn premiojn.
Aŭtoroj povas ankau mem proponi siajn verkojn (vd. la regularon). Se temas pri jam publikigitaj verkoj, la publikigo devis okazi en 2010.
bildeto el Informilo 2006
Ĉiujn konkursaĵojn – en unu ekzemplero, escepte de tiuj por la branĉo Infanlibro, kiujn oni devas havigi en kvar ekzempleroj – oni sendu al Belartaj Konkursoj de UEA, ĉe Michela Lipari, viale Giulio Cesare 223, IT-00192 Roma, Italio aŭ prefere rete al: michela.lipari(ĉe)tiscali.it, indikante pseŭdonimon por gardi la anonimecon de la aŭtoro.
La absoluta limdato por la ricevo de konkursaĵoj estas la 31-a de marto 2011.
Premioj: unua premio 240 EUR, dua premio 168 EUR, tria premio 96 EUR; Nova Talento 168 EUR; Infanlibro de la Jaro 504 EUR.
Detala regularo haveblas ĉe UEA kaj legeblas ankaŭ ĉi-tie.
Pri la rezultoj de la ĝisnunaj konkursoj vi povas legi ĉi-tie (inkuzivas plurajn rete legeblajn premiitajn verkojn, precipe de Sten Johansson)
Premiita eseo de Sten Johansson pri Belartaj konkursoj
Fonto: „Gazetaraj komunikoj de UEA“
pd
- publikita 1. 11. 2010
- 1805 homoj de tiam tralegis tiun ĉi artikolon
- paĝon oni povas printi