Esperanta Retradio eĉ nun estas por ni ĉiutage! Kion ni faru por ĝi?

Anton Oberndorfer el Aŭstrio pli ol 10 jarojn kun nekredebla kaj admirinda konsekvenceco, inventemo kaj eltenemo kune kun kelkaj siaj kunlaborantoj el Pollando, Ĉeĥio, Israelo, Brazilo, Francio k.a. landoj kreas por esperantistoj ĈIUTAGE kelkminutan novan, kvalite registritan aŭdprogramon pri iu interesa temo, akompanatan ankaŭ de la skriba teksto (por pli bona kompreno).

Kontribuaĵoj pri kulturo, sano, scienco, ekologio, psikologio, historio, edukado kaj aliaj fakoj kutime koncernas pozitivajn kaj esperigajn aktualaĵojn aŭ interesaĵojn, kio estas vere freŝa akvo por nia menso. Krom akiro de novaj kaj ofte ankaŭ utilaj informoj ĝi ebligas perfektigi nian lingvonivelon. Ĉiu povas procedi per rapideco laŭ sia bezono.

En tiu ĉi koncepto kaj amplekso ĝi estas vere unika fenomeno en la Esperanto-movado, kiu meritas aprezon!

ĈEA de pluraj jaroj klopodas diskonigi radion en siaj informiloj. Anton Oberndorfer i.a. prelegis kaj gvidis seminarion dum la ĈEA-Kongreso en Pelhřimov en 2016 (la videoregistrajĉon vidu sube inter ligiloj). Unu el regulaj kontribuantoj el la programoj estas ĈEA-membrino Jaroslava Malá, plurfoje kontribuis ankaŭ Pavla Dvořáková.

retejo Esperantaretra­dio.blogspot.com

Kiel orientiĝi en la retejo kaj kiel serĉi kaj trovi artikolojn?

Klakinte al Esperantaretra­dio.blogspot.com unue vi devas supre dekstre klaki OK por akcepti „cookies“. Poste aperas al vi la ĉefpaĝo kun diversaj prezentmanieroj. Esploru, kiu plaĉas al vi.

La maldekstra „Classic“ prezentas artikolojn kronologie ekde la plej aktuala. La dekstra „Timeslide“ kunigas artikolojn en ĉ. dusemajna periodo. Aliaj eblecoj havas ekz. formon de magazino aŭ prezentas piktogramojn al kiuj vi povas intuicie klaki. Aŭ tute dekstre vi ankaŭ povas skribi serĉvorton en la serĉilo.

Malgraŭ malfacilaĵoj kaj iom post ioma malkresko de fortoj kaj entuziasmo la redakcio ankoraŭ plu kolopodas daŭrigi la elsendadon. Sed kiom longe sufiĉos fortoj kaj motiviĝo kaj kiom longe sen bezonata reeĥo de la aŭskultantoj?

Estus certe granda domaĝo, se la radioelsendo ĉesus!

KION ĈIU EL NI POVAS FARI POR SUBTENO DE LA PROJEKTO?

• vizitadi la retejon Esperantaretra­dio.blogspot.com , aŭskultadi programerojn laŭ sia elekto, skribi komentojn sub la artikolojn (kiuj motivigas la verkintojn)
• kundividi la informon kun siaj Esperanto-geamikoj aŭ samklubanoj (retmesaĝe, en Facebook-grupoj k.t.p.), rekomendi la paĝaron aŭ konkretajn elsendojn, ev. diskuti pri la temoj dum la retaj kunvenoj
• skribi al la ĉefredaktoro Anton Oberndorfer al la adreso aldone @ aon.at kaj esprimi sian intereson kaj subtenon – estas tre grave scii, ke ekzistas kontentaj aŭskultantoj, por kiuj indas plu agi
• kaze de intereso ev. proponi kunlaboron – pri verkado kaj/aŭ registrado de artikoloj (subteno/konsiloj estos al vi donitaj)

Antaŭdankon por viaj vizitoj, uzo, reeĥo kaj subteno! La Esperanta Retradio kaj ĝiaj kreantoj sendube meritas tion, ja ili estas ĉi-tie por ni ĉiuj!

Pavla Dvořáková

Ligiloj

ĈEA-informiloj

• Radio-parolado de Esperanto tra la Interreto – videoregistraĵo de la prelego de Anton Oberndorfer dum la ĈEA-Kongreso en Pelhřimov (2016) – en la Muzea paĝo ĉe Ipernity
• Elekto de novaj artikoloj de ER en ĈEA-Retkomunikoj
• Novaj artikoloj en la Esperanta Retradio Esperanto.cz 2017
• Novaĵoj en Verda Stacio kaj en E-Retradio Esperanto.cz 2014

Ceteraj fontoj

• Kronologia listo de la artikoloj de la Esperanta Retradio
• Paulo Viana – Esperanta Retradio 10-jara Youtube 20.2.2021
• Traduki – antaŭulo de la Esperanta Retradio videokanalo de Anton Oberndorfer ĉe Youtube kun sonartikoloj legitaj el Vikipedio