Kristnaska Viro respondas en Esperanto
Kiel kutimas, la 1-an de decembro oni skribas
leterojn al Kristnaska Viro. Skribu al li! Kaj li respondos al vi! Li kapablos
tion ankaŭ en Esperanto!
Ni invitas do ĉiujn esperantistojn, kaj junajn, kaj spirite junajn, partopreni la tradicion skribi al Kristnaska Viro.
Simple sendu permane skribitan leteron (en Esperanto memkompreneble) al la adreso:
AVO FROSTO
NORDA POLUSO
KANADO, CANADA
HOH OHO
Kristnaska Viro preferas permane skribitajn leterojn, eĉ se ilin skribus malgrandaj manetoj, kiuj nur lernas skribi.
Ĉefe ne forgesu klare mencii vian nomon kaj adreson, por ke vi certu, ke la respondo atingos vin. Krom tio klare indiku, ke la letero estas skribita en Esperanto (ekzemple sur la koverton algluu iun afiŝeton kun esperanta motivo aŭ en la letero la vorton “Esperanto” emfazigu), ĉar la helpantoj de Kristnaska Viro ne ĉiam rekonos la lingvon.
La poŝtkodo HOH OHO estas vera kaj grava parto de la adreso. Ĝi estas rezervita nur por Kristnaska Viro.
La poŝtkotizon vi pagas nur por la letero al Kanado (en Ĉeĥio 20 kronoj ĝis 20 gramoj), la responda letero estas memkompreneble senpaga. Mi mem partoprenis la tradicion en la jaroj 2008 kaj 2010. Mi forsendis la leteron kaj post la reveno el jarfina aranĝo mi trovis hejme la respondon de Kristnaska Viro. Do tio vere funkcias! :-)
Pliajn demandojn povas respondi:
Normando Fleury
koboldo por la Kanada Poŝta servo
Esperanto-Societo Kebekia
6358-A, rue de Bordeaux, Montrealo, Kebekio, Kanado, H2G 2R8 normandfleury(ĉe)gmail(punkto)com
Miroslav Hruška
miropiro2312(ĉe)gmail(punkto)com
- publikita 1. 12. 2011
- 1444 homoj de tiam tralegis tiun ĉi artikolon
- paĝon oni povas printi