Tutjara humuro-ekspozicio en la Muzeo de Esperanto
Tutjara ekspozicio de Esperanto-humuro el la verkaro de la
konata ĉeĥa desegnisto kaj karikaturisto Pavel Rak estis inaŭgurita la
12-an de junio en Muzeo de
Esperanto en Svitavy.
Post solena malfermo, okazinta kadre de la aranĝo
Muzea nokto, kune kun bapto de la ĉeĥlingva versio de la lernolibro
„Esperanto per rekta metodo“ de Stano Marĉek (eldonita de KAVA-PECH), okazis ankaŭ
figurarta ateliero por infanoj „Desegnado kun Pavel Rak“.
Pavel Rak estas longjara esperantisto, kiu per siaj desegnaĵoj riĉigis vicon da E-libroj kaj gazetoj (vidu informojn en Vikipedio).
Fotogalerion el la inaŭguro vi povas trarigardi ĉi-tie kaj fotaĵojn de la DESEGNITA HUMURO mem ĉi-tie.
La ekspozicio estos vizitebla ĝis la sekva Muzea nokto en junio 2011.
Kelkaj el la ekspoziciataj spritaĵoj kaj multaj aliaj troviĝas ankaŭ en la kvarlingva publikaĵo „Pavel Rak – Desegnita humuro“, kiun eblas aĉeti rekte en la muzeo aŭ ĉe la eldonejo KAVA-PECH.
La urbo Svitavy, situanta norde de Brno en pitoreska pejzaĝo de
Bohemia-moravia limlando, i.a. naskiĝurbo de Oskar Schindler, estas
sendube vizitinda per si mem (vidu la E-lingvan retpaĝaron de la urbo ĉi-tie).
En la proksimeco situas renesanca urbeto Litomyšl, troviĝanta sur la UNESKO-listo, kaj aliaj vidindaĵoj.
Ebleco de favorpreza tranokto en romantika turo de la E-muzeo mem, rekte en la historia urbocentro. Ni pretas helpi vin aranĝi vian restadon.
Info: muzeagrupo@esperanto.cz
- padv-
- publikita 16. 6. 2010
- 1670 homoj de tiam tralegis tiun ĉi artikolon
- paĝon oni povas printi